Hanakamjuvet

Fram til 1860-åra frakta dei malmen frå Gullnes på kløv langs ein smal rideveg oppi dalsida på nordsida av Hanakamjuvet. I 1866 fekk dei endeleg køyreveg på andre sida av elva. Det gjekk tilbake med gruvedrifta, og vegen blei lite halde ved like. Han blei tatt i bruk av traktor og tømmerlass. Etterkvart tok dei fine, gamle steinmurane til å rase ut. Seljord Sogelag og Seljord Idrettslag slo seg saman med kommunen og søkte Riksantikvaren om stønad til istandsetting. I august 1990 blei det arrangert kurs i tørrmuring her. Den praktiske oppgåva for kursdeltakakarane var nettopp å setje i stand murane på gamle-vegen ved Hanakamjuvet. Sogelaget fekk hjelp til å ta vare på eit viktig industri-fornminne i bygdi, og idrettslaget fekk emne for ei fin turløype. Vegvesenet stilte med kursleiar og var ein viktig medspelar for å få dette i stand.

Hanakamjuvet er kjend for eit vakkert turområde, ikkje berre for steinmuren, men og for den mektige fossen som hiv seg ned i dalen.

Ta kontakt med turistinformasjonen for rutebeskriving