Hold kjeft, det er Ibsen!

Bestemora til Liv Gulbrandsen elska Ibsen. Og ho tok barnebarnet med seg i teateret for at Liv, i altfor ung alder, skulle få sjå Hedda skyta seg. Bestemor hadde ei historie ho ikkje kunne fortella, og nokre livsviktige råd. Men kva historie var dette? Nokre gonger må me bruka andre sine ord der me manglar våre eigne. Mange kjenner forfattar, programleiar og kulturpersonlegdom Liv Gulbrandsen frå hennar feministiske, litterære harselas på scenen. Fifty Shades of Grey-trilogien, Karl Ove Knausgård sitt seksbindsverk Min Kamp og Jo Nesbø sine krimbøker om Harry Hole har alle vore gjenstand for Gulbrandsen sin godlynte vrede. Når ho no tar utgangspunkt i verka til Noregs største dramatikar, kan me forventa oss ein annan, og meir personleg historie. Liv fortel om kloke og merkelege opplevingar av Ibsenskodespel saman med bestemor, i ei halsbrekkande forestilling der du kan gråta og le, eventuelt le til du gret. Forestillinga Hold kjeft, det er Ibsen! er ei komisk, nær og inderleg kjærleikserklæring til mødre og bestemødre, om generasjonars strev, om kunsten, teateret – og ikkje minst om Henrik Ibsen.