Kinnakyrkja på Kinn

Den sagnomsuste Kinnakyrkja er bygd i romansk byggjestil, truleg ein gong på 1100-talet. Kyrkja er den eldste og einaste i sitt slag i Sunnfjord, og er eit av dei flottaste mellomalder-monument på Vestlandet. Fjellveggen bak kyrkja reiser seg steilt opp, og den ruvande Kinnaklova er næraste nabo. Den berømte Kinnaklova er eit kjend seglingsmerke langs skipsleia.

Kvar ligg Kinnakyrkja?

Kinn kyrkje ligg på øya Kinn utanfor byen Florø i Kinn kommune. Ta den lokale rutebåten frå Florø til Kinn. Etter at du stig i land på Kinn kan du følgje vegen til høgre mot Kinnakyrkja. Turen til kyrkja tek om lag 20 minutt i roleg gange langs ein 1 km lang grusveg.

Kva tid er Kinnakyrkja open?

Kinnakyrkja er open kvar sommar frå midten av juni til slutten av august. Eit frivillig vertskap tek imot deg og er til stades i kyrkja i opningstida. Det er enkel tidebøn to gonger om dagen.

Kinnakyrkja er stengd frå september til midten av juni.

I denne perioden er kyrkja berre open etter førespurnad eller i samband med arrangement i Kinnakyrkja.

Overnatting på Kinn

Ønskjer du å overnatte på Kinn? Då kan du overnatte på DNT-hytta på Kinn.

Mat og drikke på Kinn

Skal du reise til Kinn, er det viktig å ta med mat og drikke sjølv. Det er verken servering eller butikk på øya, så du må ta med deg det du treng for opphaldet.

Toalett på Kinn

Når det er vertskap på Kinn, frå midten av juni til slutten av august, er det toalett ved Kinnakyrkja.

Frå september til midten av juni er det ikkje ope toalett på Kinn.

Kystpilegrimsleia

Kinn kyrkje er ein nøkkelstad i Kystpilegrimsleia, den historiske ferdselsåra som følgjer kysten frå Egersund til Trondheim. Langs leia finn ein kyrkjestader, handelsplassar og kulturminne som i hundreår har vore viktige stopp for reisande.