Nedstrand Bygdemuseum

Nedstrand bygdemuseum har fleire samlingar og avdelingar. Ved ferjekaia er den gamle tollbua frå «Ryfylke Toldsted» gjenreist i eit vernebygg. Tømmeret er datert til 1550 og den er dermed ein av dei eldste bevarte trebygningane i Rogaland.

Ved Gamle Stranda skule (1875) har museet kontor, møterom og skiftande utstillingar. Ungdomshuset på Baustad er bygd i 1913 og var fram til 1992 ein møtestad for ulike lag og organisasjonar. I dag finn ein små utstillingar her som viser arbeids- og kvardagsliv på 1900-talet, gjenstandane kjem frå den lokale samlaren Ommund Vatland. Eit av romma i ungdomshuset er brukt til Kirkebøsamlinga, her finn ein legekontoret til distriktslegen i Nedstrand, Jon Kirkebø, frå 1925-1949. Store delar av Vindafjord og Suldal kommune var den gongen ein del av Nedstrand legedistrikt.