Nordsida kultursti

- ei kulturhistorisk vandring langs gamle stiar på den veglause Nordsida.
Turen startar frå Åkrafjordtunet, Teigland, med ein kort båttur over fjorden. Her følgjer du den gamle skulevegen og ferdselsåra frå garden Kvanndal til Eitveit - eller motsett veg - i spennande og variert kulturlandskap.

Her er unik flora og fauna, og mellom anna mange styvingstre. Dei fråflytta, men velstelte tuna minner om tider då her var yrande liv og levande gardsbruk på den veglause sida av Åkrafjorden. Den gamle stien går langs mosegrodde steingardar og har mange flotte utsiktspunkt undervegs. Vegen går også over den flotte bilbrua som blei bygd i 1962, men som endar opp i ein smal sti i kvar ende. Den står der som eit einsamt minnesmerke over draumen om veg på nordsida.
Terrenget er variert med enkelte bratte partier, og fotturen tek 3-4 timar inkludert matpause. Turen passar for alle som er i normalt god form.

Turen kan bestillast som gruppetur med lokal guide, eller av enkeltpersonar som vil gå på eigahand. Ta kontakt for pris! Du kan også kjøpa med deg ein liten ryggsekk som inneheld eit godt lunsjmåltid med lokal mat. Ved gruppeavtalar legg me gjerne inn matpause hos hyggeleg vertskap på gardane Eintveit eller Kvandal.