Rundtur til Ryvarden kulturfyr i Sveio

Ein rundtur på vakre bygdevegar til Ryvarden kulturfyr.

Start ved Sveio golfpark. Sykle gjennom sentrum og ta av opp bakken mot høgre nokre hundre meter etter kyrkja. Ta til høgre på Tjernagelvegen og følg vegen ca 3 km til skilt til Eltravåg (obs! Dette stykket er det stadvis smal og svingete veg med ein del tungtrafikk). Ta til venstre mot Eltravåg og følg Skiftestadvegen ca 3,5 km fram til Rv 541 Gullvegen. Ta mot venstre i krysset.
Ved Lyngholmsvegen kan ein ta ein kort avstikkar til minnestøtta over DS ”Thor”s forlis i 1906. Turen går forbi Vandaskog og Mølstre, i Mølstrevåg tar du til høgre og følgjer skiltinga til Ryvarden. Dei siste 2,5 km ut til fyret går på grusveg i kupert terreng gjennom ope kystlandskap.

På Ryvarden er det ope galleri og kafe søndagar og dei fleste kvardagar i sommarsesongen. Om ein ynskjer å overnatte kan ein leige eit koseleg hus med stove, kjøkken, bad og fire soverom. For bestilling/avtale om leigetid kan ein kontakte Gunn Bente Håvardsholm på tlf. 53 74 80 00. Sjå www.ryvarden.no for meir info.

Turen tilbake til Sveio sentrum går på lite trafikert veg over Paddevegen. Sving tilbake mot venstre i Mølstrekrossen, og ta av inn på grusveg mot høgre ved gammalt gardstun. Når du kjem ut på Tjernagelvegen igjen, ta til høgre og etter omlag 200 meter til venstre inn mot sentrum og tilbake til utgangspunktet.

I Sveio Golfpark kan ein leige syklar. Tlf.: 53 74 20 25.

Tekst oppdatert 6. sept 2018