Nordfjordeid
Opplev vikinghistoria frå Nordfjordeid på Sagastad! Lær om kongar, maktkampar, store reiser, mytologi og mystiske ritual – ei spennande oppleving for heile familien.
Stig om bord i det 30 meter lange Myklebustskipet – ei gjenbygging av Noregs største kjende vikingskip. Leik deg gjennom utstillinga med VR oppleving og interaktive installasjonar. Få med deg kinoen «Det brende skipet» og test kunnskapane dine om vikingane sine tokt og reiser ut i verda.
Utstillinga i senteret er tilgjengeleg på norsk, engelsk, og tysk. I tillegg kan du utan ekstra kostnad nytte deg av audioguide på spansk, fransk, engelsk, italiensk, nederlandsk og tysk. Til audioguiden nyttar du eigen smarttelefon, og gratis Wi-Fi på senteret. Vi anbefaler å ta med hovudtelefonar/buds.
Sagastad er eit moderne senter som opna i 2019. Det spesielle, svarte signalbygget som rommar skipet og utstillingane er ei openbaring i seg sjølv. At dette er verdens vakraste naust er vi ikkje i tvil om!
Senteret ligg like ved fjorden i sentrum av bygdebyen Nordfjordeid. Akkurat på halvvegen mellom kysten med surfeparadiset i Hoddevika og det storslåtte Vestkapp-platået, og i andre enden høge fjell med utsikt over turkise vatn og brearmar i Loen og Olden. Uansett kor i Nordfjord du overnattar er Sagastad ikkje meir enn om lag ein time med bil.
Opningstider:
Oktober–november:
Tysdag–laurdag: 12:00–16:00
Stengt søndag–måndag.
Ope for grupper og cruiseanløp etter avtale.
Desember–januar:
Stengt.
Februar–mars:
Tysdag–laurdag: 12:00–16:00
Stengt søndag–måndag og i påska, 21.–29. mars.
April:
Stengt grunna sjøsetting.
Mai–september:
Ope kvar dag, måndag–søndag: 09:00–17:00.
For meir informasjon, besøk nettsida til Sagastad.
Velkomen til vikingtida!
Kilde: Nordfjord