Tursti til Botnabrea

Stad

Nordrepollen, Mauranger.

Turkart

Folgefonna nasjonalpark.

Start- og sluttpunkt

Jukla kraftstasjon.

Parkering

Frå Nordrepollen 12 km på godt sikra anleggsveg med fast dekke, til P-plass ved Jukla kraftstasjon.

Merking

Informasjonstavle ved P-plass. Inga merking.

Gradering

Blå. Moderat krevjande, to støvlar etter DNT-systemet.

Høgdeskilnad

740 - 1100 moh.

Tidsbruk

3 timar t/r.

Gode råd

Ved stor vassføring kan bekkene ved Botnatjørna vera vanskelege å passera utan støvlar. Nytt: Bekkene på nordsida av Botnatjørna har samla seg i eitt stort løp innerst. Her kan vera vanskeleg å kryssa, spesielt for born. Ta heller den flotte turen til Juklavatnet. Sjekk gjerne med Kvinnherad Turistinformasjon om det ligg snø - i så fall er det litt for tidleg for turen.

Turomtale

Bilturen inn Maurangerfjorden og på anleggsvegen frå Nordrepollen til fjells, er ei oppleving i seg sjølv. Vegen har fast dekke og er godt sikra. Statkraft si vasskraftutbygging i Maurangerfjella er rekna for å vera den mest krevjande som er gjort i Noreg. Frå P-plassen forbi vegbom og på grusveg 1 km til Botnatjørna. Frå utkjørsla litt forbi demningen, går ein ned på flatene, for så å ta seg over bekkene på nordsida av Botnatjørna.

Langs austsida av Botnatjørna til sti som rundar opp nordaust og inn i Botnane. Her er som eit klasserom for undervisning om korleis breane påverkar landskapet, med avsetjingar og morenerygger, og eit moseteppe som ein sjeldan ser maken til. Deretter bratt opp mot nord i laus grus og stein til markert skar. Her er ein såkalla "påkastvarde", dvs at alle som passerer her kastar på ein stein.

Frå skaret kjem ein ned i dalen som leiar inn til Botnabrea. For å gå inn på brea må ein ha naudsynt utstyr og erfaring, men eit fullgodt alternativ er ei delvis ulendt oppdagarferd i berga langs sørsida av bretunga. Her er uvanleg mange flotte og varierte is- og bergformasjonar.

For oppdatert turskildring, sjå www.ut.no