Bli med på ei heilt spesiell reise gjennom det særeigne kystlandskapet i Solund! Møt dei frittgåande villsauene og lær korleis lokalsamfunnet har skapt eit sentrumsnært villsaulag – ein levande del av naturen som held kulturlandskapet i hevd.
Opplev den fascinerande historia om den gamalnorske sauen, også kalla villsauen – ein direkte etterkomar av vikingtidas sauer. På denne turen kjem du tett på dei frittgåande villsauene, medan du lærer om livet på øyane både før og no. Du får besøke dei robuste sauene som har levd side om side med kystfolket i over 5000 år, og høyre korleis dei saman har halde landskapet og lyngheiene i hevd gjennom generasjonar.
Hardbakke Villsaulag er ein viktig grunn til at FjordKysten Regional- og Geopark vart nominert til Noregs bidrag til Europarådets landskapspris 2020–2021. På safarien får du ikkje berre møte villsauene – du får også spennande innsikt i Solunds storslåtte øyrike, frå landskapet si tilbliving til livet her i dag.
Villsausafarien startar frå Hardbakke i Solund kommune. Frå Bergen køyrer du nordover i to timar til fergekaia Rutledal, medan du frå Førde køyrer om lag halvannan time til fergekaia Rysjedalsvika. Begge ferjeruter fører deg til Krakhella, der du køyrer vidare i om lag 30 minutt til Hardbakke. Møtestad for turen blir avtalt individuelt.
Den guida turen varar i om lag halvannan til to timar, og du blir guida gjennom heile opplevinga. Dette er ein enkel vandretur i naturterreng eller på sti.
Turen passar for alle, både familiar, barn og vaksne.
Pris per person er minimum 250 kroner, og det må vere minst fire deltakarar per guida tur. Det blir gitt gruppeprisar for større grupper.
Turen er tilgjengeleg heile året, med unntak av mai, då det er lamming.
Gled deg til ei autentisk oppleving der du kjem tett på både dyreliv, kystkultur og den ville, vakre naturen i Solund.
Kilde: Visit FjordKysten og Sunnfjord