Andakt i tonar: konsert med BIT20 Ensemble

Denne kvelden er dedikert Anton Webern, den austerrikske komponisten kjent som meisteren av stillheit.
Hans finmeisla, presise komposisjonar er lada med tyngd, trass den nøysame bruken av notar. Som på eit museum, der kvart objekt er medvite plassert og nøysamt kuratert, er Webern sine utvalte tonar vekta og gjennomtenkte, medan alt overflødig er skore bort.
"Klarheit! Klarheit! Über alles Klarheit!"
– Anton Webern

I ei tid der me vert invadert av lyd og inntrykk har kyrkjerommet fått ein ny appell og BIT20 Ensemble ynskjer å invitera til ei introspektiv oppleving i Nykirken. Unn deg ein pause og tre inn i eit rom for ettertanke og stor kunst.

Fanboy
Kunstnarisk leiar, og dirigent for kvelden, Bjarni Frímann, er kanskje Webern sin største fanboy og på guterommet hans sto eit innramma bilete av komponisten på nattbordet. Len deg tilbake denne tysdagskvelden medan Bjarni fortel deg kvifor Webern er så spesiell.
På kyrkjegolvet står eit fullt ensemble – klart for å gjera deg óg til ein fanboy eller fangirl.

Dørene opnar 18:30